Selmana
Santa
Nel pasáu mes d’Agostu tuvi entreteníu
con diversos llibros publicaos sobre la historia moderna d’Asturies que me
permitieron evocar dellos fechos de la mio adolescencia. El 20 de marzo de 1967
tolos periódicos de la rexón asturiana publicaben la siguiente noticia: “El
Gobierno ha cursado una circular a todos los estamentos por la que se recuerda
que desde las 12 horas del jueves Santo, dia 23 del actual, hasta las 13 horas del
domingo de Resurrección, se suspenderá cualquier tipo de espectáculo público,
incluso cabarets, sin más excepción que algún concierto sacro, representación
teatral o cinematográfica de carácter única y exclusivamente religioso u otros
de índole análoga. Ninguna audición hablada de carácter frívolo será permitida
desde el día y hora citados. Las audiciones habrán de acomodarse a la
austeridad y gravedad propias de la Semana Santa. Así mismo queda prohibida
toda clase de publicidad durante los dias Jueves, Viernes y Sábado Santo, hasta
la mañana del Domingo de Resurrección”.
La nota firmábala’l Delegau Provincial
del Ministeriu d’Información y Turismo. A estes altures del tercer mileniu de
nuestra era, muncha xente nacía nos años 70 pue pensar que esto ye un inventu
salíu d’otra galaxia. Pero ye una situación cierta que me presta muncho
recordar, porque siendo guaje ninguna fecha yera tan bien aprovechada como los
tres días finales de la Selmana Santa. Encontrábeste con que nun había espectáculos;
los chigres y cualquier tipo de comerciu taben pesllaos; nun funcionaben los
autobuses ni la mayor parte de los trenes y los “carboneros”; suspendíense les
competiciones deportives y namás se permitía dir a misa con cara desgraciau, a
rezar ante los santos que teníen tapá la cabeza. ¿Qué podíamos facer entonces
les camaretaes de rapazos en feches tan sagraes?. Pues simplemente pasalo
perbien. Ninguna fecha del añu yera de tantu xaréu pa nosotros. Xuntábemenos
dos docenes de collacios caún cola su bicicleta y díbemos d’excursión hasta’l
puertu Tarna o hasta Uvieu o Xixón llevando tienda campaña, bocadiellos, bebida
y otres provisiones hasta volver del periodu vacacional. El tramu que va d’El
Entregu a Tarna recorríase n’etapes “como ye natural” y ca vez que paraba el
pelotón yera pa entamar dalgún númberu festivu. Al llegar a la altura La
Chalana, yera’l momento del bañu, pero en marzo tovía nun podíes ponete en
bañador. Había xente a reventar y teníemos tol tiempo necesariu pa observar los
pozos de agua cristalino que díbemos visitar pol verano. Y despachábemos el
primer bocadiellu, tumbaos nel prau enorme a la derecha’l riu, de pación
verdina y más cómoda que cualquier alfombra oriental. Debaxo’l puente de la
carretera que va d’Entralgo a Villoria l’agua arremansaba a tolo ancho y el riu
tenia aspeutu de piscina de fondura considerable; allá na época veraniega, los
que presumíen de nadadores tirábense de calón desde la parte riba’l puente ante
la espectación por mostrar estilu y valentía. Siento verdadera pena pasar agora
per La Chalana y ver un desiertu nes riberes del riu. Hay que pone-y una
medalla d’oru al Conceyu de Llaviana por saber despreciar una fuente d’ingresos
tan importante pa la xente de la Cuenca qu’ellí diba a pasar el día; la
Corporación nun movió undeu pa day al sitiu unes infrastructures turístiques que
diben contribuir de sobra a la riqueza de la zona. Pensaremos que yeren otros
tiempos y otros dirigentes políticos. Nestos llugares desarrollábase “La Aldea
Perdida” y paezme qu’el Conceyu de Llaviana dio muestres de la Oportunidá
Perdía. Garrábemos nuevamente la bicicleta y carretera p’alantre. Facíense
dalgunes paradines n’El Condáu, Puente d’Arcu, Rusecu y Tanes. Pero’l descansu
seriu nun llegaba hasta Campu Casu. Siempre se concidía con otros “ciclistas” de
distintes procedencies pa montar d’alguna fiesta colectiva na plaza’l
Ayuntamientu. Si facía sol, almirabes la grandeza de la peña El Piquero, onde
s’asienta a la so falda la población. Siempre alcontrábemos cariñosa acoyida de
los munchos compañeros casinos que diben al nuestru Institutu
d’El Entregu y que s’esforzaben en mostranos les buenes coses d’aquel Conceyu
que presume de tener vaques de raza propia y una riqueza envidiable poles perres
que manden los parientes que marcharon a facer les Amériques al otru llau del
Atlánticu. Recuerdo un añu qu’acampemos en Caliao tres dies, concidiendo con que
taben ellí mozos de diverses nacionalidaes pertenecientes a un grupu que
llamaben “Los Traperos de Emaús”. Pudiemos chapurriar el pocu
inglés o francés que sabíemos del bachiller y prestó a esgaya la experiencia.
Sobretoo reconocimos el méritu de unos rapazos universitarios que trabayaben
desinteresadamente pola xente necesitao ensin pidir nada empara; na Comarca del
Nalón nun conocíemos asociaciones asemeyaes. Fueron varios los años que
lleguemos hasta Tarna, onde armemos la tienda campaña en dalgún espaciu
resguardau de la nieve. Puedo añadir poco sobre les maravilles del paisaxe que
tien la ruta, les viesques frondoses d’El Gamonal, El Negru y Retriñón; los
valles pequeñinos que dexa’l ríu entre montes casi inaccesibles. Pero ye una
excursión del mayor interés pa facela andando o en bicicleta. Nunca en coche.
Tendréis sensaciones irrepetibles col gorgolitu de los páxaros o viendo
espantase a los esguilos o rebecos cuando sienten los paisanos acercase. Poques
coses s’asemeyen a una carrera de caballos salvaxes que tovía viven al so aire
pelos montes qu’arrodien el paisaxe. Particularmente hubi pásalo mal cuando una
manada de xabalinos despertónos pela nueche buscando alimentu. Pero valió’l
casu pa poder contalo y tomar nota de los riesgos que conlleva llegar
desinformau a cualquier parte que desconoces. Andar per Tarna implicaba
obligación de visitar la Fuente La Nalona, regueru pequeñin que va
engrandeciendo hasta acolumbrar San Esteban de Pravia. Y sin apartase muncho
del senderu, ye pecao dexar de ver la cueva Tunel de Boyo, monumento que
construyó la naturaleza pa que gozaren los entendíos de les coses bien feches. Llegaba’l Domingo
Santu y yera menester dar la vuelta a casa. La radio ya ponía discos dedicaos y
la Iglesia llevantara’l llutu pol Señor. El camín yera cuesta abaxo y tardábase muy poco en llegar. Ya
teníemos chigres abiertos pa tomar culinos de sidra y l’ambiente yera’l de tol
añu. Terminárase la Selmana Santa cumpliéndose los preceutos del Gobiernu, y
teníemos que poner el despertador n’hora pa llegar al Institutu a les ocho la
mañana…
J.Aurelio Rabanal
No hay comentarios:
Publicar un comentario